Hassan Magulumali
Katibu Mkuu Wizara ya Utamaduni, Sanaa na Michezo Bw. Gerson Msigwa amesaini Mkataba wa ujenzi wa Uwanja wa Mpira wa Miguu wa Jijini Arusha na Mkandarasi kutoka kampuni ya CRCEG atakayejenga Uwanja huo kwa gharama ya shilingi Bilioni 286.
Hafla hiyo imefanyika leo Machi 19, 2024 Jijini Dar es Salaam na kushuhudiwa na Kamati ya Kudumu ya Bunge ya Elimu, Utamaduni na Michezo, Waziri wa Utamaduni, Sanaa na Michezo Mhe. Dkt. Damas Ndumbaro, Mkuu wa Mkoa wa Arusha Mhe. John Mongela na viongozi wengine wa Wizara hiyo.
Hatua hii inakuja katika muktadha wa maandalizi ya Michuano ya Mataifa Africa (AFCON) ya mwaka 2027, ambapo Tanzania, Uganda, na Kenya zimeungana kuandaa michuano hiyo mikubwa barani Afrika kwa timu za taifa.
Ujenzi wa uwanja huo mpya unalenga kuimarisha miundombinu ya michezo nchini na kuhakikisha Tanzania ina vifaa vya kisasa vya michezo, ikiwa ni sehemu ya maandalizi ya kushiriki katika AFCON ya mwaka 2027.
Uwanja huo unatarajiwa kutoa fursa za kufanya mazoezi na kufanya michuano mikubwa ya soka katika eneo la Arusha na maeneo jirani.
