Media Wire Express Correspondent
Waziri wa Ujenzi, Innocent Bashungwa, ametoa agizo la kuchukuliwa hatua kali dhidi ya mameneja wazembe wa Wakala wa Ufundi na Umeme (TEMESA) kufuatia malalamiko ya mara kwa mara kutoka kwa wananchi kuhusu huduma duni zinazotolewa na taasisi hiyo,Miongoni mwa malalamiko makubwa yaliyotolewa ni kuhusu huduma ya kivuko cha MV Tanga, kinachohudumia eneo la Tanga.
Bashungwa, akizungumza katika kikao cha wadau kilichofanyika huko Dodoma, alielezea kutoridhishwa kwake na utendaji wa mameneja wa kanda na mikoa wa TEMESA ambao wameonyesha uzembe katika utekelezaji wa majukumu yao hivyo amemuagiza Mtendaji Mkuu wa TEMESA, Lazaro Kilahala, kuchukua hatua za haraka kwa kuwasilisha majina ya mameneja hao ili hatua za kinidhamu ziweze kuchukuliwa.
Bashungwa alieleza kutoridhishwa kwake na utendaji wa kivuko hicho, ambacho kimekuwa kikikabiliwa na changamoto za mara kwa mara, ikiwa ni pamoja na kuvunjika kwa vifaa na kucheleweshwa kwa huduma. Aliitaka TEMESA kufanya marekebisho haraka ili kuboresha huduma za kivuko hicho na kuepuka usumbufu kwa wananchi wanaotegemea huduma hiyo.
Soma:Rais Samia Atoa Fedha Za Dharura Wizara Ya Ujenzi
Aidha, Bashungwa aliitaka Wizara ya Ujenzi kufanya ukaguzi wa kina na kubaini matatizo yanayokwamisha utendaji wa TEMESA, hususan katika usimamizi wa huduma za vivuko nchini. Alihimiza umuhimu wa usimamizi bora wa taasisi hiyo ili kuhakikisha huduma za usafiri zinaboreshwa na kudumishwa kwa manufaa ya wananchi.
Mtendaji Mkuu wa TEMESA, Kilahala, alikiri kuwepo kwa changamoto katika huduma ya kivuko cha MV Tanga na kuhakikisha kuwa timu ya wataalamu inafanya kazi kurekebisha hali hiyo. Hata hivyo, alitoa uhakikisho wa kufanya kazi kwa bidii ili kuboresha huduma na kurejesha imani ya umma kwa TEMESA. Kauli ya Bashungwa imepokelewa vyema na wananchi wanaotumia huduma za TEMESA, ambao wameomba hatua za haraka zichukuliwe ili kurejesha hadhi ya taasisi hiyo na kuboresha huduma za usafiri nchini.
