Joseph Isangura
Waziri wa Elimu, Sayansi na Teknolojia, Prof. Adolf Mkenda, ametoa wito kwa Tume ya Vyuo Vikuu Tanzania (TCU) kuendelea kushirikiana na vyuo vya elimu ya juu katika mchakato wa kuboresha mitaala ili iendane na Sera ya Elimu na Mafunzo ya Mwaka 2014 Toleo la 2023
na Mitaala Mipya ya Elimu Msingi. Prof. Mkenda aliyasema hayo alipokuwa akifungua mkutano wa majadiliano kati ya TCU na viongozi wa vyuo vikuu nchini, uliofanyika jijini Dodoma.
Katika hotuba yake, Prof. Mkenda alisisitiza umuhimu wa ushirikiano kati ya TCU na vyuo vikuu katika kuboresha elimu nchini. Alisema, “Ni muhimu kwa TCU kutoa maelekezo kupitia majadiliano ili kuhakikisha ushirikishwaji wa wadau wa elimu ya juu.” Aliongeza kuwa majadiliano haya ni muhimu kwa sababu mageuzi ya mitaala yanagusa ngazi zote za elimu, kutoka elimu ya awali hadi elimu ya juu.
Waziri Mkenda alifafanua kwamba mabadiliko haya ni muhimu katika kuhakikisha ubora wa elimu nchini. “Mageuzi ya Mitaala yanagusa ngazi zote za Elimu. Wanapohoji juu ya ubora wa elimu, hawaangalii tu elimu ya awali, msingi, sekondari na ualimu bali wanagusa mpaka elimu ya juu,” alieleza.
SomaZaidi;Utafiti: Watoto Uswazi Hali Mbaya Kielimu
Pia alieleza umuhimu wa vyuo vikuu kujipanga vizuri katika kuandaa walimu watakaofundisha katika shule za sekondari. Alisema, “Katika kutekeleza mageuzi ya elimu katika ngazi ya chini, vyuo vikuu vinapaswa kujipanga katika kuandaa walimu wanaokwenda kufundisha katika shule za sekondari, hivyo ni lazima kuangalia nini sera inahitaji.”
Prof. Mkenda alibainisha kuwa kuna masomo mapya katika mitaala iliyoboreshwa ambayo yanahitaji walimu, akitoa mfano wa somo la ujasiriamali ambalo halina walimu wa kutosha. Alisema, “Katika sera na mitaala iliyoboreshwa kuna masomo mapya ambayo yanahitaji walimu. Kwa mfano, somo la ujasiriamali ambalo halina walimu wa kutosha, hali inayosababisha utekelezaji wa sera mpya katika elimu ya sekondari kuanza na Mkondo wa Amali pekee.”
Waziri huyo alisisitiza umuhimu wa vyuo vikuu kuanza kujiandaa kupokea wanafunzi watakaohitimu kidato cha tano katika mkondo wa elimu ya amali. Alisema kuwa wanafunzi hao watakuwa na diploma na watahitaji kujiunga na shahada za amali katika fani mbalimbali.
Kwa upande wake, Katibu Mtendaji wa Tume ya Vyuo Vikuu Tanzania, Prof. Charles Kihampa, alieleza kuwa kikao hicho kitajadili utekelezaji wa Sera ya Elimu na Mafunzo ya Mwaka 2014 Toleo la 2023 na Mitaala mipya ya elimu ya awali, msingi, sekondari na ualimu. Alisema, “Kikao hiki kitajadili namna vyuo vikuu vitakavyoboresha mitaala ili kuendana na mabadiliko haya.”
Mkutano huo umeleta matumaini mapya kwa wadau wa elimu nchini, huku ikitarajiwa kuwa ushirikiano kati ya TCU na vyuo vikuu utazaa matunda mazuri katika kuboresha mfumo wa elimu nchini Tanzania.
You have mentioned very interesting details! ps decent website.
I have read some good stuff here. Certainly worth bookmarking for revisiting. I wonder how much effort you put to make such a wonderful informative web site.