Hassan Magulumali
Jeshi la Polisi Mkoa wa Songwe linamtafuta Masumbula Nemson, Mkazi wa Kitongoji C katika Kijiji cha Namkukwe, wilayani Songwe kwa tuhuma za kumuua mtoto wake wa miezi minne aitwaye Blasto Nemson, kwa kumpiga na fimbo kichwani upande wa kulia wakati akigombana na mama yake.
Ugomvi huo unaohusisha wivu wa mapenzi, unadaiwa kuibuka baada ya mtuhumiwa kumtuhumu mkewe kuwa na uhusiano wa kimapenzi na mwanaume mwingine.
Kamanda wa Polisi Mkoa wa Songwe, Theopista Mallya, amesema tukio hilo limetokea Machi 8, 2024 majira ya saa 2:00 usiku na kwamba baada ya mtuhumiwa kufanya kitendo hicho alitorokea kusikojulikana.
“Upelelezi unaoambatana na msako mkali unaendelea kumtafuta mtuhumiwa na pindi akikamatwa atafikishwa mahakamani kwa hatua za kisheria” – amesema Kamanda Mallya.
Katika tukio hilo, pia mama wa marehemu alijeruhiwa kichwani na mikononi wakati akijikinga na kumkinga mtoto wakiwa wanashambuliwa kwa fimbo na mtuhumiwa.
