editor
Leo, Bunge la Jamhuri ya Muungano wa Tanzania limekutana jijini Dodoma kwa ajili ya kusoma Bajeti Kuu ya Serikali kwa mwaka wa fedha 2024/25.
Kikao hicho kinafanyika wakati ambapo ripoti ya Waziri wa Mipango na Uwekezaji, Profesa Kitila Mkumbo, imeonyesha ongezeko kubwa la deni la Serikali.
Kufikia Machi 2024, deni la Serikali limefikia kiwango cha Trilioni 91.7, ikilinganishwa na Trilioni 77 mwaka 2023. Hii ni sawa na ongezeko la asilimia 19.1 katika kipindi cha mwaka mmoja tu. Profesa Mkumbo ameeleza kuwa ongezeko hilo limetokana na kupokea fedha za mikopo ya ndani na nje kwa ajili ya miradi ya maendeleo.
Deni hili linajumuisha Trilioni 30.7 za deni la ndani na Trilioni 60.9 za deni la nje. Kulingana na ripoti ya Waziri Mkumbo, ongezeko la deni limechangiwa na kupanda kwa viwango vya kubadilisha fedha na kuongezeka kwa riba kwenye mikopo ya nje.
Kusomwa kwa bajeti kuu ya Serikali leo kunatoa fursa kwa wabunge kujadili na kupitisha mipango na matumizi ya fedha za umma kwa mwaka ujao wa fedha. Waziri Mkumbo amesisitiza umuhimu wa matumizi sahihi ya fedha hizo kwa miradi ya maendeleo ili kuleta mabadiliko chanya katika jamii.
SomaZaidi;Yanga Yamtamani Kibu Denis: Yaweka 150M Kumnasa
Serikali inalenga kuwekeza katika miradi itakayozalisha mapato na kuleta maendeleo ya kiuchumi na kijamii. Sekta kama afya, elimu, miundombinu, kilimo, na ajira inatarajiwa kupewa kipaumbele ili kuhakikisha ustawi wa wananchi.
Huku deni la Serikali likiendelea kuongezeka, kuna umuhimu wa kuchukua hatua madhubuti za kudhibiti matumizi mabaya ya fedha za umma na kuongeza mapato ya ndani. Ufanisi wa utekelezaji wa miradi na udhibiti wa deni ni muhimu katika kuhakikisha maendeleo endelevu ya taifa.
Wananchi wanatarajia kuona bajeti inayoweka mkazo katika kuleta maendeleo ya kweli na kuwaletea manufaa ya moja kwa moja. Tunasubiri kwa hamu maelezo zaidi kutoka kwa viongozi na wabunge kuhusu mipango na matumizi ya fedha za umma kwa mwaka ujao wa fedha.
Tutakuwa tukifuatilia kwa karibu majadiliano ya Bunge na kutoa taarifa zaidi kuhusu hatua zinazochukuliwa na Serikali katika kudhibiti deni la taifa na kuhakikisha maendeleo ya nchi.
