Mama Mwinyi Atoa Taulo za Hedhi Pemba

Mke wa Rais wa Zanzibar, Mama Mariam Mwinyi, ametoa wito kwa taasisi zote za umma na binafsi pamoja na jamii kwa ujumla kushirikiana katika kumkomboa msichana wa Zanzibar.

Mama Mwinyi, ambaye pia ni Msarifu na Mwenyekiti wa Bodi ya Wadhamini ya Taasisi ya Zanzibar Maisha Bora Foundation (ZMBF), alisisitiza kwamba wasichana wana haki ya kupata fursa sawa za elimu kama watoto wa kiume.

Akizungumza katika hafla ya ugawaji wa taulo za kike kwa wanafunzi 1,500 wa Skuli ya Sekondari Micheweni, Mkoa wa Kaskazini Pemba, iliyofadhiliwa na Taasisi ya Lady Fatima Foundation kutoka Korea Kusini kupitia mradi wa “Tumaini Initiative” kwa ajili ya hedhi salama, Mama Mwinyi alielezea umuhimu wa elimu na afya ya wasichana katika maendeleo ya jamii. Hafla hiyo ilifanyika tarehe 16 Juni 2024.

Mama Mwinyi alisisitiza kwamba ushiriki wa wazazi, walezi, na jamii nzima ni muhimu ili kufanikisha malengo ya kumwezesha msichana wa Zanzibar. Katika hafla hiyo, alifurahia kuona ushirikiano mzuri kati ya taasisi mbalimbali na serikali katika kuleta mabadiliko chanya kwa wasichana wa Zanzibar

SomaZaidi;Ummy Akerwa kadi za kliniki kuuzwa

Mradi huu wa “Tumaini Initiative” ni moja ya miradi mingi inayolenga kuhakikisha kuwa wasichana wanapata elimu bora na mazingira salama ya kusoma bila vikwazo vya kiafya au kijamii. Akizungumzia mpango huo, Mama Mwinyi alisema kuwa usambazaji wa taulo za kike ni hatua muhimu katika kuhakikisha usafi na heshima kwa wasichana wakati wa hedhi. Alisema kuwa miradi kama hii inawasaidia wasichana kuepuka aibu na kukosa vipindi vya masomo kutokana na changamoto za hedhi.

Hafla hiyo ilihudhuriwa pia na viongozi mbalimbali wa serikali, wakiwemo Waziri wa Elimu na Mafunzo ya Amali, Mhe. Lela Mohamed Mussa, Mkuu wa UNICEF Zanzibar, Laxmi Bhawani, na Mkuu wa Mkoa wa Kaskazini Pemba, Salama Mbarouk Khatib. Ushirikiano huu unadhihirisha juhudi za pamoja za serikali na mashirika ya kimataifa katika kuboresha hali ya elimu na afya ya wasichana wa Zanzibar

Mama Mariam Mwinyi alitoa wito kwa mashirika na asasi mbalimbali kuendelea kushirikiana katika miradi inayolenga kuwawezesha wanawake na wasichana kiuchumi na kijamii. Alisisitiza kuwa juhudi hizi zitachangia sana katika maendeleo endelevu ya jamii na taifa kwa ujumla.