Joseph Isangura
Tanzania imepata heshima kubwa kwa kutunukiwa tuzo ya Global Impact Award 2024 kutokana na jitihada zake kubwa na zenye matokeo chanya katika mapambano dhidi ya saratani.
Tuzo hiyo imetolewa na Shirika la Global Health Catalyst la Marekani na kupokelewa na Naibu Waziri wa Afya, Dkt. Godwin Mollel, akimuwakilisha Waziri wa Afya, Mhe. Ummy Mwalimu, wakati wa mkutano na wadau wa sekta ya afya wanaojihusisha na mapambano dhidi ya ugonjwa wa saratani,
Tanzania imetambuliwa kwa juhudi zake mbalimbali, zikiwemo utoaji wa chanjo ya HPV kwa wasichana, uchunguzi wa saratani ya matiti na mlango wa kizazi, usimikaji wa mashine za tiba mionzi, pamoja na vifaa vya kisasa kama vile CT scan na PET CT scan. Hii inaonyesha dhamira ya nchi katika kuhakikisha wananchi wake wanapata huduma bora za afya.
Akizungumza wakati wa mkutano huo, Dkt. Mollel alieleza kuwa Serikali inayoongozwa na Rais Dkt. Samia Suluhu Hassan imeendelea kuboresha huduma za afya nchini kwa kuimarisha miundombinu, kuongeza vifaa tiba vya kisasa, na kuhakikisha upatikanaji wa wataalam wa kutosha. Alibainisha kuwa jitihada hizi ni sehemu ya mikakati ya kupambana na ugonjwa wa saratani kwa ufanisi zaidi.
Dkt. Mollel pia alisisitiza umuhimu wa ushirikiano kati ya Serikali ya Tanzania na Marekani katika kuboresha sekta ya afya. Ushirikiano huu umesaidia kupunguza rufaa za wagonjwa wa saratani kwenda nje ya nchi kwa matibabu, hivyo kupunguza gharama za matibabu kwa Watanzania. Aliongeza kuwa, ushirikiano huo unalenga kukuza tiba utalii ndani ya Tanzania, hatua inayotarajiwa kuleta manufaa makubwa kwa sekta ya afya na uchumi kwa ujumla.
SomaZaidi;Rais Samia Awakutanisha Wataarishaji na Waigizaji Filamu Korea & Tanzania
Tuzo hii ya Global Impact ni kielelezo cha mafanikio ya Tanzania katika sekta ya afya, hasa katika kupambana na ugonjwa wa saratani. Inaonyesha jinsi ambavyo juhudi za Serikali, kwa kushirikiana na wadau mbalimbali, zimeweza kubadilisha maisha ya Watanzania wengi kwa kuwapatia huduma bora na za kisasa za matibabu.
Kwa kutambua mchango mkubwa wa wadau mbalimbali, Dkt. Mollel alitoa wito kwa wadau wa ndani na nje ya nchi kuendelea kushirikiana na Serikali katika mapambano dhidi ya saratani. Alisisitiza kuwa mapambano haya ni ya wote na yanahitaji mshikamano na ushirikiano wa dhati ili kuhakikisha kila Mtanzania anapata fursa ya kuishi maisha yenye afya bora.
Kwa kutunukiwa tuzo hii, Tanzania inajipambanua kama kiongozi katika mapambano dhidi ya saratani barani Afrika. Ni matumaini ya Serikali na wananchi kwa ujumla kuwa mafanikio haya yataendelea kuimarishwa na kupanuliwa zaidi, ili kuhakikisha afya bora kwa wote.
