Media Wire Express Correspondent
Waziri wa Nchi Ofisi ya Makamu wa Rais (Muungano na Mazingira), Mhe. Dkt. Selemani Jafo, ametangaza kuwa miti milioni 266 imepandwa katika Mamlaka za Serikali za Mitaa Tanzania Bara hadi kufikia Machi 2024. Akiwa bungeni jijini Dodoma leo, Juni 10, 2024, Dkt. Jafo alisema kati ya miti hiyo, milioni 211 imestawi, sawa na asilimia 79.3.
Akijibu maswali bungeni, Dkt. Jafo alibainisha kuwa utekelezaji wa mpango huo ni sehemu ya Ilani ya Uchaguzi inayohimiza kila halmashauri nchini kupanda miti milioni 1.5. Takwimu hizi zinaonesha juhudi kubwa zinazofanywa na Serikali katika kuhifadhi mazingira na kupambana na mabadiliko ya tabianchi.
Mbunge wa Nkasi Kaskazini, Mhe. Aida Khenan, aliuliza kuhusu utoaji wa taarifa za mazoezi ya upandaji miti. Kwa kujibu, Dkt. Jafo alieleza kuwa Ilani ya Uchaguzi imeelekeza halmashauri zote nchini kupanda miti milioni 1.5, na takwimu za sasa zinaonesha hatua nzuri katika utekelezaji wake. Hii inaakisi juhudi za serikali katika kuhakikisha mazingira yanahifadhiwa.
Soma:Serikali Kuweka Mazingira Wezeshi kwa Wachimbaji Wadogo
Awali, Naibu Waziri Ofisi ya Makamu wa Rais (Muungano na Mazingira), Mhe. Khamis Hamza Khamis, alifafanua kuwa Serikali imeunda na inasimamia utekelezaji wa sera, sheria, kanuni na miongozo inayolenga kuzuia ukataji holela wa miti, hususan katika maeneo ya milimani na miinuko. Akiijibu swali la Mbunge wa Kalenga, aliyeuliza ni lini Serikali itatunga sheria kali za kuzuia ukataji miti holela, Naibu Waziri Khamis alieleza kuwa sheria zilizopo ni pamoja na Sheria ya Mazingira Sura 191, Sheria ya Ardhi ya Vijiji Na. 5 ya mwaka 1999, na Sheria ya Misitu Sura 323, ambazo zote zina vifungu vinavyolinda mazingira na milima.
Naibu Waziri Khamis aliongeza kuwa Serikali imechukua hatua mbalimbali kuhakikisha mazingira yanahifadhiwa vizuri. Hatua hizi ni pamoja na kuandaa na kutekeleza Mkakati wa Hatua za Haraka Kuhifadhi Mazingira ya Ardhi na Vyanzo vya Maji wa mwaka 2006, ambao unalenga kila wilaya kupanda miti milioni 1.5 kila mwaka. Pia, kuna Mkakati wa Taifa wa Kupanda na Kutunza Miti wa miaka mitano (2016/17 – 2020/2021).
Kwa kuongezea, Dkt. Jafo alisema Ofisi ya Makamu wa Rais itashirikiana na Wakala wa Huduma za Misitu Tanzania (TFS), Ofisi ya Rais TAMISEMI, Mamlaka za Serikali za Mtaa na Sekta Binafsi katika kutoa elimu na kusimamia sheria zilizopo kwa sasa. Ushirikiano huu unalenga kuongeza jitihada za uhifadhi katika maeneo ya milima na miinuko.
Dkt. Jafo na Naibu Waziri Khamis walihimiza umuhimu wa kuendelea kuhamasisha wananchi na taasisi kushiriki kikamilifu katika shughuli za upandaji na utunzaji wa miti. Hii ni sehemu ya juhudi za Serikali katika kukabiliana na changamoto za kimazingira na mabadiliko ya tabianchi kwa manufaa ya kizazi cha sasa na kijacho
