Joseph Isangura
Naibu Waziri Mkuu na Waziri wa Nishati, Mhe. Dkt. Doto Biteko, alizindua ripoti za utendaji wa sekta ndogo za umeme, gesi asilia, na mafuta kwa mwaka 2022/2023 katika hafla iliyofanyika tarehe 14 Juni, 2024 jijini Dodoma.
Akitoa hotuba yake, Dkt. Biteko alielezea mafanikio na changamoto zilizobainishwa kwenye ripoti hizo, akisisitiza umuhimu wa kuzifanyia kazi ili kuboresha sekta ya nishati nchini.
Dkt. Biteko aliagiza taasisi zote zilizo chini ya Wizara ya Nishati pamoja na Wizara ya Mipango na Uwekezaji kuchambua ripoti hizo kwa kina na kutoa majibu ya changamoto ndani ya miezi mitatu. “Kila fursa iliyoonekana kwenye taarifa hizi ichukuliwe kwa uzito mkubwa na itambuliwe nani ana uwezo wa kuitumia,” alisema Dkt. Biteko, akiongeza kuwa sekta ya nishati inahitaji ushirikiano wa karibu kati ya serikali na sekta binafsi ili kufanikisha malengo ya kitaifa.
Alitoa maelekezo kwa Mamlaka ya Udhibiti wa Huduma za Nishati na Maji (EWURA) kuhakikisha kuwa tathmini ya mwaka ujao inajumuisha utendaji wa nishati safi ya kupikia. Hatua hii inalenga kutekeleza ajenda ya Rais Samia Suluhu Hassan ya kuhakikisha upatikanaji wa nishati safi kwa wananchi wote ifikapo mwaka 2033. Dkt. Biteko alisisitiza umuhimu wa sekta ya nishati kuendelea kuboresha mifumo ya uagizaji mafuta na kuondoa urasimu katika shughuli zake.
SomaZaidi;Mameneja Wa Mkoa TANESCO Kupimwa Kwa Matokeo-Biteko
Aidha, Dkt. Biteko alihimiza taasisi za serikali kuona sekta binafsi kama washirika muhimu badala ya washindani. “Sekta binafsi imetutoa kimasomaso, serikali haiwezi kufanya kila kitu pekee yake,” alisema, akitoa wito kwa sekta binafsi kuchangamkia fursa zilizopo na kushirikiana na serikali katika miradi mbalimbali ya nishati.
Kuhusu miradi ya maendeleo, Dkt. Biteko alieleza kuwa serikali inaendelea kutekeleza miradi mikubwa ya nishati kama vile mradi wa umeme wa Julius Nyerere (JNHPP) wenye uwezo wa megawati 2,115. Pia aligusia mipango ya kuongeza uzalishaji wa gesi asilia, ambapo serikali imetoa leseni ya uchimbaji wa gesi katika kisima cha Ntorya mkoani Mtwara, leseni ya kwanza kutolewa tangu mwaka 2006.
Ripoti hizo pia zilielezea changamoto zinazokabili sekta ya nishati, ikiwa ni pamoja na mahitaji makubwa ya umeme yanayoongezeka kila mwaka. Dkt. Biteko alisisitiza kuwa ni muhimu kwa taasisi husika kuweka mikakati ya kudumu ya kukabiliana na changamoto hizo. Pia alitoa maagizo maalum kwa EWURA kuhakikisha kuwa tathmini za utendaji zinahusisha usimamizi wa nishati safi ya kupikia, ambayo ni sehemu muhimu ya ajenda ya serikali.
Uzinduzi wa ripoti hizi ni hatua muhimu katika kuhakikisha uwazi na uwajibikaji katika sekta ya nishati. Hii itasaidia kuboresha utendaji, kuleta maendeleo endelevu, na kuimarisha maisha ya wananchi kwa ujumla. Serikali inaendelea kujipanga na kuchukua hatua stahiki ili kuhakikisha sekta ya nishati inatoa mchango mkubwa katika maendeleo ya nchi
