Saida BOJ Aibua Mjadala Mkali Nigeria

Saida BOJ, mshawishi maarufu wa mitandao ya kijamii nchini Nigeria, amezua gumzo kubwa kufuatia kauli yake tata kuhusu wanawake kuwajaribu wanaume kiuchumi.

Katika video aliyochapisha hivi karibuni, Saida aliwashauri wanawake kuwapeleka wanaume katika majaribio ya kifedha kwa kuwatumia bili ndani ya saa 24 baada ya kubadilishana namba za simu.

“Kama mwanamke, saa 24 baada ya mwanamume kuchukua namba yako, unapaswa kumtumia bili ili kujua kama ana uwezo. Vinginevyo, unapoteza tu muda wako” alisema Saida BOJ katika video hiyo.

Soma Zaidi:Mafanikio ya Burna Boy Yanadhihirisha Utajiri wa Muziki Kiafrika

Matamshi ya Saida BOJ yameibua mjadala mkali kwenye mitandao ya kijamii na kuigawa jamii katika makundi mawili; baadhi wakiunga mkono ushauri huo kama njia ya kuwachuja wanaume wasio na uwezo wa kifedha, huku wengine wakikosoa kwa kusema kuwa inahamasisha tabia ya kutafuta manufaa ya kifedha bila kujali hisia na dhamira za kweli.

“Ni vizuri kujua uwezo wa mwanaume kiuchumi mapema, lakini siwezi kuunga mkono njia ya kumtumia bili. Hii inafanya mapenzi kuonekana kama biashara,” alisema Grace Adeola, mfanyakazi katika benki moja kubwa Lagos.

Kwa upande mwingine, John Okafor, mwanafunzi wa chuo kikuu, anasema, “Ushauri wa Saida unaweza kuwa na manufaa kwa wanawake ambao wanataka kujiepusha na wanaume wasio na nia ya kweli. Inasaidia kuondoa wale ambao hawana malengo ya muda mrefu

Mjadala huu unakuja wakati ambapo akaunti za Saida BOJ zimefungiwa kutokana na ukiukaji wa sera za matumizi za mitandao ya kijamii. Akaunti yake ya Instagram yenye wafuasi zaidi ya 300,000 na TikTok yenye wafuasi zaidi ya milioni 1.3 zimefungiwa kutokana na maudhui yenye utata na yenye kuchochea mijadala mikali.

“Mimi na timu yangu tunafanya kazi kwa bidii kuhakikisha tunarudisha akaunti hizi haraka iwezekanavyo. Lengo langu ni kutoa ushauri ambao unaweza kuwasaidia wanawake, lakini pia ninaelewa umuhimu wa kufuata kanuni za mitandao ya kijamii” alisema Saida BOJ alipoulizwa kuhusu suala hilo.

Matamshi ya Saida BOJ yamezua maswali mengi kuhusu nafasi ya fedha katika mahusiano ya kimapenzi. Wataalamu wa saikolojia na wanasaikolojia wa mahusiano wameanza kutoa maoni yao kuhusu suala hili, wakisema kwamba ingawa fedha ni muhimu, mtazamo kama huu unaweza kudhoofisha misingi ya upendo wa kweli na kujenga mazingira ya kutokuaminiana.

Saida BOJ ameweka wazi kwamba ataendelea kutoa maoni yake bila kujali vikwazo vya muda. Iwapo akaunti zake zitarejeshwa, inabakia kuwa suala la muda. Hata hivyo, mjadala kuhusu ushauri wake unaendelea kutikisa mitandao ya kijamii na jamii kwa ujumla.